O Bestiario da Catedral de Santiago de Compostela

Entre as moitas sorpresas que depara ao visitante a catedral románica de Santiago atópase a numerosa serie de capiteis con temas animalísticos que decora o seu interior. Estes, que suman case setenta exemplos, repártense ao longo de todos os espazos do edificio: na cabeceira, os brazos do cruceiro, as naves, os pórticos interiores, as galerías e a cripta. A simple observación da súa localización indícanos que estas representacións teriomórficas tenden a concentrarse en certos lugares normalmente relacionados coa topografía sacra do edificio, o seu uso litúrxico ou simplemente en importantes lugares de paso.