Nos límites do Estado de Dereito: Unha análise da Xustiza Administrativa

Libro que ten por obxecto realzar as virtualidades dun moderno Estado de Dereito no seo dunha democracia avanzada na que os dereitos fundamentais e as liberdades públicas teñen un papel esencial, vertebrador e determinante. Partindo deste propósito, analízase a evolución da xurisdición contencioso-administrativa ata o momento presente, os desfalecementos e renuncias no control efectivo da Administración Pública que mostrou a devandita xurisdición, o uso inadecuado de dogmas e tópicos que en realidade só serviron para desactivar ou anular as garantías dos xustizables cando interpoñían inxenuamente os seus recursos (discrecionalidade técnica, potestade regulamentaria como potestade política, engrandecemento do concepto de acto político ou de goberno, etc.) ou a deficiente regulación que existe en moitos extremos, como acontece por exemplo coa vía de feito. Todo iso desemboca nunha situación manifestamente mellorable, e que dende logo fai dubidar de que, en efecto, o Estado material de Dereito fose e sexa unha realidade.

A ruta que seguiu ata hoxe esta xurisdición está definida por algúns fitos de relevo -non moitos, dende logo- e moita inercia. Non se observa unha iniciativa nin unha creatividade (dentro da legalidade, naturalmente) que si se aprecia noutros países da nosa contorna, e o resultado é que moitos pronunciamentos estiveron e están nos límites do Estado de Dereito, e, incluso, algúns sinxelamente se situaron fóra del.