A obra arquitectónica e o dereito de autor

“A arquitectura será arte se ao construír o espazo se transmite unha emoción, a do arquitecto/autor que interpreta subxectivamente o programa de necesidades e crea unha obra orixinal e poética” –explica Ramón Rey–. Non obstante, a actual Lei de Propiedade Intelectual (art.10) crea un problema conceptual ao reducir o valor da obra arquitectónica a planos e maquetas, que, sen prexuízo de que poidan merecer ser consideradas como obras orixinais e artísticas, e polo tanto amparadas polo dereito de autor, non deixan de ser meros instrumentos de traballo para concibir a obra arquitectónica que finalmente será construída. Así, ao longo das páxinas do libro, Ramón Rey prende luz sobre as zonas escuras dun conflito cuxa solución pasa por unha profunda revisión da actual lexislación.