Valoración do risco en adolescentes infractores (VRAI)

Os resultados extraídos dun instrumento destas características permitirían identificar aqueles factores sobre os que é conveniente centrar as actuacións durante o período de execución das medidas xudiciais, así como desenvolver estratexias de intervención capaces de favorecer o desestimento delitivo dos adolescentes infractores.

O VRAI é un protocolo estruturado e informatizado de valoración do risco de reincidencia que pretende servir de guía aos axentes dentro do sistema de xustiza de menores. O protocolo está deseñado para favorecer a toma de decisións en relación ás medidas que se deben considerar, ademais de facilitar o desenvolvemento das actuacións reeducativas. Baseado na revisión sistemática da validez preditiva das escalas elaboradas previamente e os resultados da investigación empírica, o Protocolo VRAI permite obxectivar e precisar a información necesaria para a valoración dos factores de predición do risco.

Este protocolo demostrou que pode ser útil como ferramenta de valoración dos menores que acceden ao sistema de xustiza para:

> Favorecer a toma de decisións dos técnicos sobre as medidas que se deben tomar cos menores infractores, xa que ten en conta datos de relevancia contrastada en relación a diferentes factores de risco e protección, tanto estáticos como dinámicos.

> Identificar os obxectivos da intervención e actuación educativa e, en consecuencia, favorecer o desenvolvemento de estratexias adaptadas de intervención e tratamento que favorezan a integración dos menores infractores.

> Facilitar a valoración dos progresos de cada individuo ao longo da intervención.

> Avaliar os resultados da intervención e orientar o seu seguimento posterior.